nzenga: Bukaka bua bu bakaka ? Nguilu musamu ku ntelo !

Beto bantu, bukaka ka tu zololoa boko ko, bungu ti muntu ha kati dia bantu wu butukilaka, taata na maama bie bibuti biandi, bawu bene mpe ba vuilulu kua mvila za makanda. Ni mu bungu dio tuena na bingana bi tu luengesaka ti: "bukaka musongo", pele ko "Nto wa yenda yandi kaka wa tengama". Wena wa makedika, ni buna nkatika buuna. Ka, tu lenda bakula mpe ti:"Bukaka musongo", tu lenda wa bakudila mu nguilu ya "kiyindula" pele ko ya "kimbaluka" ti: bukaka bu bukaka musongo ! Mpila mosi ti musongo ni mabela mo ma nataka mapela mu nitu na buka zonsono zi vuandilaka bantu.
Ni dina tu lenda bakula ti "Bukaka" ki kaku ka tungaka (dia mona mbuta MBEMBA mwana mama BENAZO dia DZALAMU). Kikaku kina, ni kina ki kakitilaka peleko ki kabaka nkianaeti kibaka ka kabaka ndilu na mabela na mavimpi ma sungama. Mu nguilu yawuyi tu lenda ta ti bukaka ni yandi manisaka musongo, bungu buka ka bukaka mu mansueki. Ni mu kati dia mansueki mpe bukaka bu lenda sadisa muntu wo zololo ku ki lubula. Bukaka bua bu bi bu nataka musongo, ni buo bu nataka kihambula. Tala ti nzila zandi na mbanzulu zandi ka zi tama vutu buabuana na za ba nguala ko, dio dieka diambu dia kaka, bungu hambukidi kuandi, sidi sisa nzila za baandi hana mahambu. Bukaka bua mpila yo, ka bu lenda buka ko, musongo pele ko mabela kua bu lenda nata mu nitu, bungu kihambula sidi, hambukidi kuaku !

Bukaka bu wasisaka ni buo bua mansueki bu menisaka dzunu mu ntima. Lenda wungama ka, ka ku hambuka ko, bungu bue wungama, mboko kota mu ndimbutulu, dimbitila ni dimba kue ti dimbi, bungu mu mansueki mbawu yo ya suama mu muntu ni mu kati dia bukaka ya leminaka, ya tsaminakaka mu-ntu. Mu bukaka mbo zaba ku kifimpa. Ha kati dia luaza, muntu ka lendia toma ba-nza ko. Mue ba nza, mpila mosi ti, mue vuata fuani kia NZA nkua Lulendo, ni mu mansueki kua muntu ka lenda zangululu mue ba nkatika "mu-ntu."
Ha kati dia luaza, lueti ku tu natina nza yayi na ntsaka za mpila na mpila, tu fueni tomba mpe Bukaka bu tunganka kimuntu bue hungama kuna fula. Ba kuluntu beto mpe ni buna bedi kue sadidiki. Ni mu wungama kua mansueki bakuluntu beto bedi kue tambudidiki bueso bua buyelele na bitezo bia butumbu buawu; ba kaka ku miongo bedi kue wungameke, ba kaka bedi kue wungameke kuna mabenga, ba kaka kuna maza, kuna kitadi, kuna kitadi, kuna sangi...
THAUKO.COM, kimuntu kua !