"Piki ka yae ko, ntombokolo ntsiinga" - "Wa semba mbua, semba dibu" !

Ba nkundi zola, mulemvo ! Di ni piki dia yalumuna nsiinga zandi kua kua ntsoni. Tiya bu tu yokela mu lukuku, ntsiinga zandi labitidi tuo, ntsiangu ka ya kuaandi ! (Photo Mbanza Mayitoukou).

Tu lenda ku kiyula, "ka he di buila ?" Ba dia ngazi ba ntsuiini, ka lemina ku baka ba ntieetie. Ta yikidi muendo buuna tiii ku masese ma ngungula, tueka sehosolo dia baantu. Zu dieto mpe ka di siidi buzitu ko, ni beto ba taama kue kuenkuene; mu bungu ti nsalulu zeeto, ndiatulu zeto na mbelolo zeeto ka zena za kuezama ko. Ta "KIYUUNGA" wa ka sa tu teela: "ka  zu  di dia beeto ngaana bue kua diena, ngaana ntsi tu zololo?" Ku ba loosa masangu ko tuena, ku ba loosa nguba ko tuena, ku ba loosa looso mpe ko tuena... nkia mpila baantu kua ta yikidi ? Mpasi na matsimuna bia biingi bi tu tudilala, bungu ka tuena ba kutama ko, bungu ka tuena ba zitama ko ! "ntu buzitu, mpu buzitu" ! Tala ti zololo wa zitusua, zitama. Misamu mio mi tu kue kote na mawa ma baantu ba kondolo kimuuntu, ku bunsaana kua mi lenda kue tu tuasi.

  Medi mahata ma fuilulu, baantu ba ntsuumba ba ta kotesa mu kaanda dia kintuadi ni beeto beka manisa. Biedi bitsiinda bia bakulu beto, bia yika bidzua bia mintsende-mpangala na nianga; nani kue ku ba seenga ? Medi masangi bia yikidi bisuamunu, ta yikidi ntsian eti bindzukuntsie, mu bungu dia muendo buuna wu ta singasa. "Mpfulu wa vua banda wa yika muivi bikedi", ka tu zoonza andi, tue tadi kua dia meso ngaana? Ntangu kua zi fuanane kue beeto mu bakula ? Nkia mpila mapela tu fueni buabuana na mo , ngaatu ta lubuka ? Ta seeno mulembi ntsiila: kani ka bue, ta kunguna'eno, ta seeno ntsimu, ta bikeno muendo buuna.

  Tala ti laki dia lolo baala beto, vula-vula ba ndumba beka kue safuki mu ntsi za nzeenza, ni mu buungu dia bimpa bia buhulu bi tu kue songese ti beto ni beto. Mu ba ngudia muuntu, fueni laanda ntsalulu za bo be na ntsaangu, bieka ni bilanda-landa, mu tuula bitezo biina. Babingi bizi hombela ka mahata ma bo ba buaka mukanda nitu, ba sambila Nzambi za ba wara... busafu bua buingi tu tama yobela, mu kue tombe kua nzila mputu, buungu bo ba tekela ko ba songesaka ti kuawuku mia miansoni mia fuomba. Ba biingi ba taama fuuka, ba fuila mu nzadi mungua pele, ba taama fukila ku maseese, ba beti luika kihangu kia matumbu peleko kia bundoongo... mukento wa ndombi buzitu bu mu widi, mu buungu dia mbelolo zaandi, na ntsalulu zaandi... tala ti ngebene ku ti zitisi ko, nani lenda ku hana buzitu ? Nduatulu na nzonzolo bia muangana....bo ba tama lu mona beka lu bongela ntsiana'eti bibulu bia mpaamba mpaamba, biima bia ntsaka za buuna-buuna. Tuka ku dukila ntangu na te ku yi diamina, bakento ba ndoombi bake na bingi beti zitusua, mu bungu dia bimbakila biawu, koondo kua ndiatulu za zitama. Ta sungamana ba kento ba mawa ma kaka, mbo tu mona ti bibusi bieto na baala beeto ba ba kento mpfudi za yayana zi sakidi. Ta vilukeno madiela, ngatu ta lembo kue safuki, ntsiana bu tu taama kue mone mi taama kue yooke mu bitala-tala bia moona bia nkatu bi tua tambudi.

   "Mbandu yi ya mbote ka mpe ya matsimuna", taata Biayenda wa ta wo mu kati dia mukaanda'andi wa lusantsu, mu mvula lusambuadi na ya, ka tsonekene wo. Mbandu yi tuena yena ya nzaanda mpfiotokoso, ka beto bene mpe tu fueni sa bunkete. "Wo tama bandamana tala kondolo nsoni, wo we mu bitala ngaana ni yandi fueni mona nsoni ?
   Mia mingi mieti ku tu kuamisa, ka mvutu za konso samu zi fueni tuuka ma mayindu meto. Ntele bo ndembolo kuani, we na ndunzi ka bakula, Ta-Ma Mpungu wa , Bonga, sa ! THAUKO.COM , sadi kieno !